當年今日
關於我們

求驗客手記:一百萬零一個柏拉西奧斯 - 求驗客

蘋果日報 2009/02/25 00:00


剛在奧斯卡贏盡獎項嘅電影《一百萬零一夜》(SlumdogMillionaire),內容背景以印度貧民窟為主,講主角如何由一位窮人,參加遊戲節目,搖身變成百萬富翁。其實,英超亦係一個活生生嘅百萬富翁遊戲,好多窮小子藉着足球,成為小富翁,好似熱刺嘅柏拉西奧斯就係其中一人。
身價可頂洪國4支班霸
我求大俠周一晚睇英超直播,現在台足球評述員鄭兆聰就好直腸直肚,話呢個柏拉西奧斯點值咁貴;以佢身價,喺洪都拉斯可以搞4支頂級球隊。我都即時畀聰仔嚇一嚇,好彩比賽中後段,聰仔都讚番吓柏拉西奧斯嘅表現。
事後我求大俠再問好熟中北美洲球壇概況嘅聰仔,佢話由於洪都拉斯唔算係一個發達嘅國家,所以當地足球亦唔係好蓬勃,要喺當地組成一支班霸,每季營運費都係大約200萬美金;另外,球員嘅月薪就更加只係4,000到5,000美金,兌起港紙都係3至4萬,人工絕對唔高;不過柏拉西奧斯𠵱家轉會到熱刺,閒閒地都4、5萬鎊周薪。
不過,聰仔補充話24歲嘅柏拉西奧斯唔係唔好波,只不過以佢喺日前熱刺聯賽對侯城嘅作用,呢類貨色身價真係只值4、500萬鎊,熱刺要成1,200萬鎊先至買到佢,全因耕開有人爭,炒到貴晒啫!如果講到最值錢嘅洪都拉斯球員,聰仔就寧願揀𠵱家外借到賓菲加嘅國際米蘭前鋒蘇亞素,話晒都喺意甲證明過射手本色,唔似柏拉西奧斯咁,未紅先炒貴。
布魯士繼續尋寶
出身於中北美洲國家洪都拉斯嘅柏拉西奧斯,07年8月由國內球會奧林比亞外借至伯明翰,之後以100萬鎊轉會費加盟韋根,到上月以1,200萬鎊投效熱刺,短短唔夠兩年就搖身變成貴價球星,升級仲快過搭噴射機。韋根一轉手執過千萬鎊,領隊布魯士當然唔放過賺錢機會,手上已有厄瓜多爾嘅路爾斯華倫西亞呢隻金蛋,曼聯已經準備喺夏季轉會市場開價成1,800萬鎊撬佢。最近又傳出用600萬鎊簽入厄瓜多爾前鋒基斯迪賓尼迪斯,睇吓又係唔係下一個百萬富翁?
百萬富翁上位之路
1〉效力球會:奧林比亞
效力年份:02-08年 上陣次數:102次 入球:32球

2〉國家隊:洪都拉斯
效力年份:03年至今 上陣次數:58次 入球:4球

3〉效力球會:韋根
效力年份:08-09年 上陣次數:37次 入球:0球

4〉效力球會:熱刺
效力年份:09年至今 上陣次數:3次 入球:0球