9.12選舉過後,各路人馬,特別係勝出嗰啲,都要稍作休息,以迎接新嘅挑戰。范徐麗泰雖然係舊人,重係主席,但係今次第一次享受到直選滋味,快感自然好唔同。
佢嘅競選經理周德熙話,由於范太以前冇直選過,所以冇往績可尋,選前亦冇定下任何指標,今次攞到65,661票,算係高票當選。佢認為范太得到支持,其中一個原因係范太起步早,過去四年嘅地區工作有用。不過有內幕消息,中方替范太與福建大嫂配票,都幫咗范太唔少。
當然,范太單人匹馬,選舉工程比有政黨背景嘅候選人辛苦,後期佢隻左手腫晒,大家都擔心佢舊病復發,𠵱家選完冇事啦,一家四口會外出旅遊幾日,而周德熙大功告成之後,亦會同愛妻黃英琦以及一班朋友去昆明打高球,佢笑話自己助選冇瘦到,亦唔覺得特別辛苦,「以前開部長級會議都係開通宵,重要談判,呢啲小兒科啫。」
黃英琦就對今次選舉錯漏百出感到好激氣,認為已經過晒公平、公開嘅底線,胡官應該要好好檢討。
(圖)范太高票勝出,自己都拍吓自己手。
傳真︰2623-9278
電郵︰
[email protected]