雷宇揚安排囝囝雷庭於廣州一所國際學校就讀，雷宇揚話呢間學校一條龍可以讀到大學，最重要係，課程同各地嘅分校一樣，唔係求其搵幾個外國人教書就叫國際學校。

不過，學習對雷宇揚嚟講，唔係囝囝嘅全部：「我對佢學業唔緊張，讀書咁叻做咩啫，唔使太緊張，唔好太差就得，我揀啲冇乜功課嘅學校，最緊要玩。我知香港啲教育真係變態，我朋友個女朝早6點幾返學，夜晚返到屋企做埋功課12點半，人生係咁點掂呀！細路仔應該係玩，識字就得，呢方面我唔會俾壓力。」

虎媽虎爸喺現今社會好普遍，但雷宇揚堅持唔做虎爸，佢話：「我一定唔係虎爸，我太太都唔係虎媽，我覺得最緊要佢開心，如果佢唔開心，強逼佢做一樣嘢都冇意思，佢鍾意一樣嘢，自己就會成功，父母俾小朋友就係愛同教育，我同我太太都俾好多佢，最重要係佢自己讀得開心，玩得開心，冇話想佢將來做咩職業讀咩書，我唔係嗰種人。」

雷宇揚對囝囝嘅專長、嗜好抱持開放態度：「3歲幾暫時未睇到佢嘅專長，唱歌跳舞係人都識，佢一般開心我已心滿意足，順其自然，我作為爸爸盡量幫佢，喺教育放面着手，如果有一日佢同我講喺演藝方面有興趣，我會量度吓佢有冇料到先，睇吓佢有冇天份，如果冇就搵第二啲嘢去做，喺教育放面輔助佢，如果鍾意玩音樂咪做音樂囉，如果演藝一事無成唔好嘥時間，幫佢反而累咗佢。」

處處為兒子着想，雷宇揚話太太停薪留職兩年冇做嘢，全心全意照顧小朋友，前兩年佢忙於工作周圍飛，親子活動欠奉，雷宇揚話：「近一年我比較飛少啲，多啲時間留喺佢哋身邊，小朋友生活好簡單，早上6點幾起身，晏晝3點幾放學返屋企，去公園踩單車、去波波池玩吓，一般小朋友同父親做嘅嘢我都做晒，食完飯之後就瞓，我哋嘅親子活動一般平民白姓都會做，食飯、落公園，陪佢踩單車、游水，就係咁簡單，一齊瞓、送佢返學，同佢一齊發神經、瀡滑梯，已經係好開心，陪佢睇電視，佢逼我睇卡通片。」

想隨時獲得更多親子資訊，快啲like Easy PaMa Facebook啦！
https://goo.gl/1qWM8g