全城聞油魚色變,有電視台新聞節目搞另類真人騷,召集為食「死士」以身試魚,食嚿油魚扒落肚試吓會唔會屙油,若然中招,就要對住鏡頭喺幾百萬市民面前親述屙油滋味,八方知道電視台首選搵民主黨立法會議員李華明做人辦,肥仔明有個大肚腩,一睇就知係為食之人,堪稱政界「食神韜韜」,加上佢聲言可能帶頭告百佳,搵佢上鏡至啱。
點知肥仔明畀檸檬人食,八方問佢做乜縮沙,唔通講就天下無敵,煮到埋嚟就唔敢食?肥仔明話佢啃件油魚扒好容易,但屙油就手尾長,事關今日要接受電台訪問,聽日要去論壇,加上呢兩日要落區連跑幾場街坊活動,「唔通呢兩日鴨住條尿片出街咩?」