要數近期沙田攻勢最勁之練馬師，葉楚航認第二冇人敢認第一，佢已連續五次田戰交出頭馬，當中更有三次起孖，難怪能穩居練馬師榜首位置。今期沙田賽事葉廐出馬既多且惡，其中「真慷慨」及「草原威龍」剛於季內跑入前兩名，大有機會替馬房延續田戰佳績。
「草原威龍」上仗於谷草1200米後上入Q首度上名，證明減至30分以下已找到支持點，由於史卓豐停賽，故幕後找來曾替同主「紅辣椒」及「好辣椒」贏馬之巫斯義重新接手，力爭收復前失。另外，「真慷慨」今季三戰獲冠亞季各一，八歲馬喜逢第二春，難怪上周三贏完咁快又再跑，擺明幕後想打鐵趁熱再贏多場。