【新增圖片】

騎而優則練的告東尼（人稱告仔）年尾大打反擊，最近起勢贏馬冇停手，其中最威水的當然係本月10日憑「馬克羅斯」揚威香港盃，佢平安夜61歲牛一，正好提前慶生。

一日未到牛一，告仔呢個馬場派對都未結束。今午（23日）告仔在第九場二班田草2000米，與潘頓合作為「時時精綵」大熱開齋。

此駒單Win及組合獨贏A1均派18.5元，同場旗下貴價灰馬「代代為王」由吳嘉晉後追第二，告仔更包辦44倍馬房Q，可謂盡領風騷。

名氣馬「時時精綵」外地賽績好，是今年1600米一級賽愛爾蘭二千堅尼季軍，身價絕對唔低，上仗一班田草1600米配蔡明紹得亞軍只不敵灰色神獸「五十五十」已甚佳。

今勻換上潘頓操刀，大幅增程至2000米，顯得更厲害，沿途留住跑居後，轉直路彎時已急不及待移出外叠望空，等直路衝刺，果然入正直路冇耐已經一衝過晒，贏2.75馬位返嚟，從中顯示呢匹三歲北半球自購馬好有實力。

「時時精綵」勢成今季2000米香港打吡熱門分子，賽後潘頓在凱旋門逗年幼女兒Roxy玩，教她振臂歡呼yeah一大聲，兩父女都好high。

趁死對頭雷神停賽，潘頓今午盡情數糊，跑完第九場已憑「美麗寶貝」、「旺蝦王」及「時時精綵」三匹公眾熱門，捧盃中三元，個人累積連勝八個賽日，兼於今期騎師王提早封王。

第九場開出高價自購馬連贏，跑第二的是豪氣馬主潘蘇通名下、當年來港身價據報八個位的灰馬「代代為王」，此駒在港苦戰多時終於首度入圍；三、四名分別為「勝利仔」及「歡樂盈盈」，四重彩派三萬三千幾。