睇馮睎乾講王亭之故事，過癮非常，左丁山唔識馮睎乾，聽講佢年紀細好多，論年紀，應該點都係王亭之徒孫輩，世界上好少有徒孫輩份罵師公輩可以罵得咁爽、咁深入，而且有根有據，引經據典嘅，王亭之在佢嘅「坎坎胡」（kankanwoo.com）不時發表愛國偉論大罵美國，唔知會唔會睇完「徒孫」之文章，拍案而起，奮筆直書，教訓教訓小馮呢類徒孫呢？佢嘅文筆好好㗎，值得學習，不過年紀大，八十幾歲，記憶力差啲，數字唔熟，呢方面就唔好賣弄嘞。

王亭之在YouTube談話，講到1993年有人搵佢辦報反共，佢一口拒絕，兩年後就有「蘋果」出現，似層層，連黨媒都信以為真，8月17日在A4版全版報導，順便砌毒果，真係識者笑死，局外人嚇死。王亭之1980年代中走咗去夏威夷，據佢啲香港徒弟講係預卜香港九七後唔掂，走人先；點知夏威夷並唔係咁好，於是再移民加拿大，在外近三十年，又冇翻查經濟數據，於是竟然講：1993年有人搵我辦報，斥資四千萬港元，買廠房，買機器，其中一千萬送畀佢嘅，四千萬元在1990年代初係好多錢，五十萬元足可買到一個豪宅……

唔使查番數據，憑一手記憶，左丁山已經畀王亭之笑死，何謂「豪宅」？1993年可以用五十萬元買一個單位？沙田第一城在1981年推出賣樓花，市民排隊排幾條街買樓，向河1015平方呎單位售價約一百萬元，一位電視藝員買咗兩三個，蝕到佢跳起，因為左丁山一世人第一次買樓就係1982年入市買沙田第一城1015呎，全河景望銀禧體育館，遠眺馬場，實價72萬元，1994年用450萬賣咗，改為租樓，曾畀朋友笑到面黃，話錯失97前樓價狂升機會，但亦因此避過97後金融風暴，樓價大跌之慘況。即係咁，王亭之話1993年50萬元可買個豪宅，純係噏得出就噏，老人家失憶咗。講到辦報，四千萬元在1993邊度夠錢買廠房兼買機器？簡直笑話，左丁山在91至94年管過兩張報紙，一賺一蝕，識得四千萬元只係一個小數目，如果仲畀一千萬王亭之做總編輯，好快就蝕清光啦。王老先生講93年數字，或者有啲加拿大藍絲相信，香港長期居民就知道離晒題，唔怪得佢嘅YouTube談話，有本地藍絲廣傳！