當年今日
關於我們

【特首前哨戰】胡官切合港人渴望 王宗堯揶揄葉劉活喺自己世界

蘋果日報 2016/12/16 18:24

葉劉淑儀張建聲胡國興陳詩慧王宗堯

王宗堯、張建聲及陳詩慧今日喺新城為電台節目《同聲彤氣,come on James!》錄音,佢哋喺節目中交換聖誕禮物。提到特首戰,王宗堯覺得胡國興嘅政綱係港人渴望啲嘅:「不過未知佢得唔得到祝福,葉劉(淑儀)都幾活喺自己世界,希望香港人唔會跌入佢魔掌,林鄭就更加深不可測啦。」
至於聖誕節,宗堯話今年聖誕忙於為舞台劇綵排,女友蔡潔正喺泰國拍戲,所以冇得一齊共渡佳節:「不過已經計劃好完咗舞台劇就會放假,起碼放到新年先開工。」至於張建聲就繼續忙住為網劇《反黑》開工,佢透露劇集除咗會喺大陸網站播映,更計劃同Netfix合作:「睇下傾唔傾到,成為Netfix第一套香港粵語劇集。」
為咗角色,張建聲每星期都要漂頭髮,搞到佢有啲擔心脫髮問題,身旁嘅王宗堯即搞笑話會送生髮水畀佢做聖誕禮物。張建聲話漂到頭皮出血咁滯,所以試咗牛奶洗頭:「奢侈但真係舒服好多。」此外,陳詩慧就首次擔任電影配樂,又為譚芷昀擔任監製,佢話都幾大挑戰。
empty
王宗堯今日同張建聲、陳詩慧一齊到新城接受訪問。( 攝影:盧妹 )