股壇瀏覽器:零售股業績靚爆鏡

蘋果日報 2004/06/30 00:00


期指結算,淡友早市一度將大市壓至12038,午後似乎放軟手腳,大市跌幅收窄,收報12116,跌78點,成交不足100億元。值得注意是,市場對標普調高本港展望評級未有即時反應,但唔代表今日都冇反應。
大部份人估美國月底加息,但阿虎有位外滙業朋友話,美國財赤嚴重,布殊政府唔會畀格老大幅加息,佢估計6月可能唔加息,甚至今年內都未必加息,務求讓美國經濟再熱一些。但阿虎則好懷疑格老係咪咁諗,市場又會否接受。噚日議息前大部份地產股腳軟,新地(016)跌1.6%,恒地(012)跌1.5%,長實(001)跌1.3%。

堡獅龍派送不俗
零售股堡獅龍(592)公布末期業績,又係正到爆,虧轉盈賺1.18億元,派末期息6仙,另1送1紅股相當不俗,可惜此股平時成交唔多,好難炒。
噚日香港熱到爆炸,部份地區氣溫高達37度,比天文台預測最高33度重要高,有生產冷氣機嘅廣東科龍(921)原本跟住大市下跌,但好快就收復失地,平收2.675元。噚日見摩根大通密密收集,唔通佢預期華南酷熱天氣會持續好耐,所以睇好科龍?
平安保險(2318)保薦人高盛又有新作,就係保薦隻太平洋航運(2343)上市,每股定價2.20-2.90元,預測PE5.5倍。
牌面上看來相當抵買,而且招股規模唔算好大,集資金額約9.6-12.67億元,對高盛而言只屬碎料。但黑客話,就怕因為碎料,唔知高盛有冇咁好售後服務?
阿虎