2018 FIFA世界盃將於今年6月14日喺俄羅斯揭開戰幔,今年Now TV 聯同ViuTV聯手直播賽事,其中nowTV更將獨家4K直播64場球賽,ViuTV就會免費播放19場賽事,包括揭幕戰、兩場四強賽事同決賽。nowTV仲請咗專業評述團隊,包括前足球先生陳炳安(阿巢)、前香港足球隊成員林慶麟、球員暨港隊青年軍教練曾偉忠、港超球隊領隊文彼德、現役港超球員謝德謙同梁冠聰,Keyman馬啟仁、陳恩能(丹尼爾)同何輝等等都會加入。今次ViuTV仲為咗世界盃推出四個節目,分別係4月30號播出《Good Night Show全民星戰》、3月6號播出嘅《全港的》、5月28號播出,由Ansheles主持嘅《返歸啦俄仔》同埋6月1號播出嘅《衝三小-橫衝直播俄羅斯》衝三小仲會去到俄羅斯做facebook直播。。
今日ViuTV請來一眾藝人齊集奧海城舉行「2018 FIFA 世界盃啟動禮」造勢,包括應該已經睇咗十幾屆世界盃嘅明星足球隊成員:譚詠麟(阿倫)、黃日華、羅家英、泰迪羅賓、戴志偉、林敏驄、劉浩龍、李雨陽,咦,羅鈞滿都有份喎!阿倫喺台上分享時話今屆世界盃高手林立,佢就睇好法國,因為好多超級球星,黃日華就話好想美斯高舉世界盃明撐阿根廷,家英哥就話睇好比利時。
為咗迎接世界盃,ViuTV有一系列特備節目由3月6日起播出,包括大型綜藝遊戲節目《Good Night Show全民星戰》,將會由家庭觀眾、ViuTV藝人及嘉賓藝人一齊玩遊戲,競逐巨額獎金。今日除咗明星足球隊成員,有份參與遊戲節目嘅林保怡、劉美君、盧海鵬、歐錦棠、潘紹聰、伍家謙、林作、林芊妤、鄧月萍、賈思樂等等都有撐場,ViuTV藝人黃心美、黃奕晨、體育主持馬啓仁(Keyman)等擔任司儀,嚟撐場嘅包括現役超球員梁冠聰、港隊門將葉鴻輝、專業評述員方栢翹、黎奕倫、何輝、丹尼爾同曾偉忠(積Sir)等等,其中葉鴻輝話自己捧英格蘭,但每次都好失望。
Now Sports嘅高層陳兆祺(Gary)話世界盃4年一度,公司投放咗好多資源,會全港首創用4K播64場賽事,亦可以透過ViuTV嘅點播嚟睇番重播。