正所謂：「人必自侮，然後人侮之」，北京早前清走所謂嘅「低端人口」，喺全世界人嘅眼中，已經成為中共劣政嘅經典案例之一，單單是「低端人口」這一詞彙，就足以讓網民挖苦、嘲弄，甚至惡搞好一段日子。習總之前喺十九大「係威係勢」，一時話不忘初心，一時又講要「國家治理體系和治理能力現代化」，依家清走「低端人口」呢單嘢已經完全暴露晒內地官員管治嘅粗暴與拙劣，仲分分鐘嚴重打擊中共嘅認受性（Legitimacy），係咪想倒習總米先？

從近日各大新聞媒體嘅報道可見，北京市政府清走「低端人口」，喺法、理、情三個方面都無法講得過去。有內地學者就咁講，北京當局喺大興區發生做成19人死亡嘅大火後，要整治市內安全隱患絕無可厚非，但根據《城鄉規劃法》、《消防法》、《行政强制法》等相關法規，北京當局頂多都係只能夠向有安全問題嘅房屋所有人責令整改或罰款，並無權力趕走住喺裏面嘅租客。依家你咁粗暴清走啲你眼中視為低端嘅人，已經於法不合，仲俾人話你程序失當、趕盡殺絕，無照顧好基層民眾嘅需要，咪於理不合囉。

呢啲「低端人口」，好話唔好聽，唔係白吃白喝，都幫北京市民做緊最低下，卻又至關重要嘅工作，一些人更居住喺北京數十年，正所謂無功都有勞，無咗佢哋，北京會有今日繁華景象？你連個戶籍唔畀人都算嘞，依家仲半夜三更、天寒地凍咁走去敲人哋度門，將人哋啲嘢掟晒出街，差在未放狼狗，就咁趕人哋走，咪打完齋唔要和尚、用完即棄囉，點止無人情味，直頭無人性。

但咁樣又如何？中共從來做嘢，邊處講法、理、情㗎！似乎就只有強權，大石砸死蟹！之不過咁喎，中共成日吹噓嘅改革開放近40年成就，原來啲官員仲係活喺「洪荒時代」，管理手段粗野橫蠻，你點樣講得過去？而「低端人口」這個滿階層歧視性嘅詞彙，根本就係佢哋所創，仲經常喺啲政府文件裏面見到，呢個不容抵賴。所謂嘅「低端人口」咪其實就係當年俾中共奉到上天、靠佢哋打江山嘅「無產階級」囉。中共唔係一向自稱「無產階級的領路人」，點解今天卻將呢班人視之為「過街老鼠」，無情地驅趕？咁樣做，你仲點樣去justify你個政權嘅認受性？

中共嘅歷史觀，向來都強調階級鬥爭嘅觀點，歷朝「官逼民反」，貧農係「起義」唔係「暴動」。有指，中共呢次係因為擔心呢啲居住在城市邊緣嘅低端人口成為「亂源」，威脅社會穩定，因而要將他們清走防範於未燃。只可惜，主事官員沒熟讀由中共所寫嘅歷史，卻帶頭搞分化，將人分為高端同低端，仲要打壓低端的一方。咁樣做，咪正正將低端人口逼成「亂源」囉。依家仲俾人鬧管治「低端」，算不算自取其辱呢？

花生評論員