西班牙《阿斯報》報道，嚟緊嘅禮拜五，西班牙終於會有一條告魯夫街，係全國第一條以呢位已故荷蘭足球天皇巨星命名嘅街道。不過，呢條街並唔係喺巴塞羅拿入面。

根據報道，告魯夫街嘅位置係Tarragona省入面嘅Vallfogona de Riucorb，呢條鄉村只係得99個人住，喺巴塞羅拿市西面，距離115公里，揸車嘅話需要大約個半鐘。決定整條告魯夫街嘅係村長Francesc Llovet Albareda，其中一個原因係村入面原來仲有一條街係無名嘅，咁村長見地方又近巴塞羅拿，就自動聯絡告魯夫嘅屋企人商量。活動會喺禮拜五中午舉行，預計會有好多前球員，以及同告魯夫關係密切嘅人會出席。