距離亞視4月1日熄機還有7日，亞視原意在最後一夜舉行第27屆亞姐選美，但據前晚亞視官網刊出的節目表，顯示4月1日本港台並非舉行亞姐選美，僅於當晚10時50分重播羅霖、楊玉梅、陳彥蓉和齊真晨4位亞姐於2013年到法國拍的特備節目《Miss Asia 25th法國瑰麗巡迴》作為終結，最後一屆亞姐分分鐘爛尾，而正重播的《大內群英》和《雄霸天下》等劇未播出大結局，亞視便已熄機。問何以選擇《法國瑰麗巡迴》作告別？亞視臨時清盤人德勤公關部昨表示：「冇回應。」
除法國外，當年羅霖與楊玉梅等先後往葡萄牙和台灣等拍《瑰麗巡迴》系列，介紹美食和地方特色，為同年舉行的亞姐造勢。對於亞姐爛尾，羅霖昨說：「可惜咗好耐，電視台都冇咗，冇必要搞亞姐，出糧畀員工最緊要，做唔做落去，大家都冇感覺。」提到舊作變成最後一擊，她說：「個節目係我有份投資嘅酒生意馬伯樂贊助先拍，我嘅生意拍檔仲指定要我做main主持，點知亞視幫我推job，同人講我冇期，推薦其他亞姐去，先揭發呢件事。」亞視最後一刻仍是重播，羅霖說：「冇辦法，希望快啲好好完結咗佢，唔好再鬧笑話，好心痛。」

楊玉梅對節目成亞視終結作表示榮幸，但對亞視熄機感可惜，她說：「每個人都想幫亞視，唔希望佢倒閉，去到今日咁情況都冇法子，係心痛嘅！」楊玉梅又透露當年到法國取景的故事：「嗰時budget唔係好大，我基本上係收車馬費，水同好多樣嘢都係自己畀錢買。好多地方只可以偷拍，冇申請，當時我哋人生路不熟，冇錢請繙譯，我哋上車半路溝通有問題，慘到俾司機將行李掟走，擺我哋喺街，我哋唔識法文喺街度流浪，後尾打番香港求救。」
採訪：魯吉、唐如