車路士中場尼曼查馬迪，有望同摩連奴喺曼聯重聚？據《ESPN》同英國傳媒等報道，2014年1月由時任車仔領隊摩連奴以2,100萬鎊親自引入、現年28歲嘅塞爾維亞中場馬迪，有望喺本星期落實加盟曼聯，轉會費約為3,500萬鎊（約3.5億港元），周薪亦會高達15萬鎊（約150萬港元）。兩人曾經合作喺2014/15球季贏得英超、英聯盃雙冠王，據報摩連奴打算以佢作為卡域克接班人。

另一令呢單交易水到渠成嘅原因，係車路士亦接近完成收購摩納哥中場泰莫爾巴卡約高，轉會費同樣為3,500萬鎊。22歲嘅巴卡約高同樣司職防中，2014年由雷恩加盟摩納哥，去季協助球隊稱霸法甲，並殺入歐聯4強，今年3月亦首次取得法國國家隊「喼帽」。