之前喺馬會官方節目獲韋達重點品題嘅「戰利品」，噚日以3歲馬嘅身份孭住133磅跑1400米都可以晨操姿態贏馬，結果就換嚟被加14分的代價，成為今季勝後被加分最多馬之一；睇番之前另一被加14分嘅「積多福」升班再出亦能上名，估計對質新嘅「戰利品」唔會有太大影響，加上質新馬跑磅唔跑分，家被加到72分，跑三班賽唔使孭重磅，相信會仲有利佢發揮。至於其餘馬匹評分變動方面，「大運財」在勝出二級賽沙田錦標後，已被加5分至125分，成為全港評分第六高的馬匹，相信對此駒進軍12月的國際賽大有幫助。