【蔡志明專訪】倘康健復牌 蔡志明:會落手落腳參與業務
蔡志明康健國際曹貴子
獨立股評人David Webb去年列出「50隻不能買的港股」,捲起一場監管風暴,殼股大玩家「醫生」曹貴子自此行蹤不明,旗下康健國際(3886)亦遭證監會勒令停牌至今,已有大半年。昔日錯信「醫生」而入股康健的蔡志明說,若康健能成功復牌,他會落手落腳參與公司事務,「搞返好間公司,派多啲利息畀股東!」
蔡志明矢言不玩股票,亦從不考慮把家族生意上市,但康健一役,無奈令他在股壇添了筆「糊塗帳」。2005年他入股由曹貴子創辦的康健,兩人共同持有康健近19%股權,蔡志明更擔任副主席兼非執行董事,但他指,自己一直甚少過問公司業務;女兒蔡加怡雖然擔任康健主席,但一星期才過去一次,主要視察診所業務,沒有參與股票及其他收購交易,「佢新仔呀嘛,點識去搞個啲嘢,而且曹醫生都唔想我哋知呢啲嘢。」
蔡加怡於2005年加入康健,出任企業融資部總監,翌年獲委任為主席至今。對於康健出事,蔡志明憶述,有次加怡向他哭訴,「話收到封信,人哋儲咗500萬,買咗康健嘅股票,諗住第日可以幫補下結婚,點知蝕淨50萬都冇。我話加怡唔使喊,我哋賠畀佢啦!」並找上曹貴子商量賠償問題,誰知曹話這些是上市公司的事,勸蔡志明別理會太多,「當時我已經唔係好高興,因為公司啲股票成日上上落落,害咗咁多人唔見錢。」
曹貴子目前行蹤不明,盛傳已「走佬」到澳洲墨爾本。蔡志明月前亦到相距近900公里的悉尼釣魚兼談生意,但兩人無見面,「搵佢都冇意思,傾咩嚟?我睇佢見到我仲驚添,(你話原諒咗佢?)係,但佢做咗咁多嘢,佢自己心中有數啦,我嬲人就嬲得唔耐嘅,盞激壞自己。」
康健去年11月遭證監會停牌,又兩度被廉政公署上門搜證。蔡志明說,目前律師正着手處理復牌事宜,他有時亦與董事會開電話會議,了解公司最新情況。他指,若康健今次能成功復牌,他會落手落腳參與公司事務,「一定會每星期抽時間去睇下佢哋點做生意,盡力同董事搞好公司之餘,只要公司有錢賺,會派多啲利息畀股東,因為以前做得唔好,而家有機會做得好,一定要同股東賺錢。一定要將公司做到最好。」
全球樓行 Dream House零距離
https://hk.feature.appledaily.com/overseasproperty
蔡志明:「搞返好間公司(唐健),派多啲利息畀股東!」(馬泉崇 攝)
蔡志明表示,昔日錯信「醫生」(曹貴子,圖中)而入股康健