南韓點兵鬥國足 孫興民有得睇冇得出
國足世盃外南韓孫興民史泰歷克運動
史泰歷克(左)周一公佈南韓未來兩世盃外國家隊名單,剛於英足盃戴帽的熱刺球員孫興民上榜。
南韓國家隊禮拜一開記者會,宣佈嚟緊兩輪世盃外嘅大軍名單。「太極虎」召入孫興民、奇誠庸等外流兵,但孫興民因為停賽,對國足場波只能做觀眾。
喺月尾世盃外,南韓會先作客國足,之後再返主場對敍利亞。為咗呢兩場波,史泰歷克揀咗24人大軍,當中有熱刺射手孫興民、史雲斯中場奇誠庸、奧格斯堡嘅池東沅同具滋哲,講出名嘅南韓外流兵,係差水晶宮嘅李青龍。孫興民呢排狀態大勇,上場英足盃大演帽子戲法,幫熱刺大炒米禾爾,但國足又唔使驚孫興民,因為佢要停賽,剩係踢到對敍利亞嗰一場。唔使對住孫興民,相信張琳芃等國足守將都可以鬆口氣。
呢排南韓佈置薩德導彈防禦系統,令到中韓關係緊張。喺記者會上,史泰歷克都擔心作客國足嗰陣會被主場球迷「好好招呼」,史帥話:「遠征伊朗嗰陣,我哋就感受到作客嘅氣氛,佢哋嗰種宗教嘅氛圍畀到我哋好大壓力。我相信嗰次嘅經驗可以幫到我哋適應呢次作客國足。上次作客伊朗,嗰種主場氣氛令我哋都踢唔出水準。」
南韓24人大軍名單
門將:權純泰、金承奎、金桐俊
後衛:金基熙、張賢秀、洪正好、郭泰輝、金敏赫、李鎔、崔喆淳、金珍洙、金民友
中場:池東沅、具滋哲、奇誠庸、孫興民、鄭又榮、韓國榮、高明振、南泰熙、許榕埈
前鋒:金信煜、黃喜燦、李庭協