Netflix可能是疫情最大贏家，因為社交隔離措施，令不少人留在家收看劇集成趨勢。去年底馬田史高西斯（Martin Scorsese）執導、集兩大影帝羅拔迪尼路（Robert De Niro）與阿爾柏仙奴（Al Pacino）的《愛爾蘭人》（The Irishman）在Netflix上架，網絡放電影已變成不止「網劇」般簡單。

早前周顯揚導演、韓庚主演的電影《我們永不言棄》原定年中在戲院上映，但突如其來的疫情，戲院關閉打亂不少電影人部署。《我》片的投資方近日決定先在大陸的愛奇藝網站播映，為積壓的電影找到出路。周顯揚跟太太監製杜緻朗接受訪問分析電影轉型趨勢，周顯揚話︰「喺疫症的特殊時期，作為電影人應該變通，電影有新陳代謝，有渠道畀人去睇係好事，睇完回收（資金）再繼續去拍。」電影在網上播出後有一件事令導演頗為感觸，他說︰「今日接到呢部戲工作人員打畀我，佢話『好開心，恭喜你拍完戲畀人睇到』，跟住手足話自己上年8月轉咗行。一位從事電影工作30幾年，都頂唔住要轉去第二行，呢個感受好深。」周顯揚話就大眾所知積壓未能上映的只是幾部賀歲片，事實並非如此︰「有好多戲上唔到，唔通真係2016年拍嘅戲，要等到2023上？時裝片特別敏感，戲入面用緊iPhone5嘅，到上映時人哋都出到iPhone 19嘞，係咪會脫咗節？」

身旁的監製杜緻朗認同拍攝跟上映，是市場正常運作，她說︰「有戲出先可以拍，淨係拍（而）唔出，係件唔現實嘅事，老闆都唔會容許。做電影不斷接觸新事物去變變變，而家係變嘅時候。如果累積咗兩年戲，集中下半年播，係咪部部都收得呢？未必。拍戲要貨如輪轉，電影人就係要應變，我哋係度橋出身，把握時機，永不言棄。」她笑言電影人拍戲的目的就是可以跟觀眾「接觸」，而今趟只是換了場地。在未能預知疫情何時完結、疫情後觀眾入戲院的意欲，家居看電影是圈中人值得思考的一條出路。

周顯揚話不要再抱有網絡電影較院線電影次等的觀念，他笑說︰「首先我部都係院線戲，因應疫情同片主要求選擇喺網上放映，最終都會回歸戲院。馬田史高西斯套《The Irishman》更擺明係網絡電影，你唔會話史高西斯cheap。」他表示外國繼續這個走勢，平台需要好多內容，所以網戲只會越拍越多，變成大趨勢，是電影人值得反思的出路。

採訪︰何永寧
攝影︰仇志德

-----------------------------
App內1-Click訂閱《蘋果動新聞》
按此了解更多