當年今日
關於我們

【邵氏十二金釵】《文泰臣》半裸演出 60年代女星何琍琍演同性戀者創先河

蘋果日報 2017/02/16 00:01

邵氏女星趙世光何琍琍

何琍琍,講起呢個名,大家可能只會諗起佢係華光航業集團董事長趙世光嘅遺孀,但其實何琍琍曾經係50、60年代叱吒一時嘅邵氏女明星。
坊間話何琍琍係台灣人,但何琍琍94年,接受傳媒專訪時,就澄清咗佢係1947年底喺南京出世,後移居台灣,15歲佢被導演袁秋楓發掘,喺電影《山歌姻緣》做配角,之後佢喺《蘭嶼之歌》已榮升做第二女主角。其後佢加盟邵氏電影,同胡燕妮、沈依、金霏、林嘉、潘迎紫、趙心妍、祝菁、林玉、丁茜,合稱為「邵氏十二金釵」。順帶一提,出道時何琍琍個「琍」字,經常被誤寫成「莉」,所以有指佢係66年左右,就用咗「何莉莉」呢個藝名。
多年來,何琍琍拍過40多部電影,豪放形象已經引起國際注目。講到拍第二套片《蘭嶼之歌》,就做第二女主角,何琍琍話:「還記得拍《蘭嶼之歌》的時候,我很害怕,演技當然稚嫩,把潘壘(導演)氣死了,說我根本不會演戲,還考慮換人,但鄒(文懷)先生一定要用我。」之後佢嘅演出都好破格,好似喺《文泰臣》嘅半裸演出、《十四女英豪》入面反串演出,就攞咗亞洲影展嘅特殊超越表演女主角獎,仲有佢喺《愛奴》一片,更飾演同性戀者,就已經開創先河。其他嘅經典作品,包括《何日君再來》、《船》、《玉面飛狐》、《鐵觀音勇破爆炸黨》、《那個不多情》、《吉祥賭坊》、《大軍閥》、《北地胭脂》、《江湖行》、《舞衣》同《五大漢》等等。
72年,何琍琍曾經轉戰時裝界,事關當時武打片當道,而佢就唔擅長打鬥,但又想精神有寄託,所以就開咗時裝店,當時算係佢嘅演藝事業低潮,何琍琍曾經有諗過係咪公司唔重視佢,但後來佢諗通咗,公司花咗咁多錢栽培,冇理由唔好好利用佢,只係潮流興武打,也沒法子,佢都好慨嘆咁講:「環境可以使一個人改變。」但之後佢就接咗《吉祥賭坊》,令到佢事業再有起色,佢話:「《吉祥賭坊》角色是我最滿意的,無論是表現方式和角色,對我都是最貼切的,這可能是和我的個性一樣。」