立法會選舉曲終人散，但楊孝華仍慘遭競選對手謝偉俊一口咬實唔放，話說謝偉俊日前入稟高等法院，指楊孝華喺九月嘅旅遊界功能組別選舉中，涉嫌違反《選舉（舞弊及非法）條例》，隱瞞佢嘅幕後支持者，所以請法庭就楊當選議員是否恰當，作一公正裁決。
謝偉俊嘅選舉呈請書指，楊孝華喺一份題為「立法會旅遊界候選人真正實力大比拼」嘅選舉單張中，自稱「完全沒有」幕後支持，自己係「真材實料」，相反謝偉俊獲旅遊界教父林金文同埋康泰黃士心做靠山。
謝認為單張誤導，大錯特錯，係損害其他候選人嘅非法行為，皆因楊孝華嘅幕後支持者，其實有國泰航空、中旅社及捷旅假期，楊某講大話。
根據《立法會條例》，如果法庭裁定楊唔係「妥為選出」，楊就即時冇得做議員，中途落車出局，立法會隨時新添一名惡人，可見場官司實在非同小可。


傳真︰2623-9278
電郵︰[email protected]