仲有唔夠兩個月，新一屆政府就上場，候任特首林鄭月娥嘅新班子未有消息。至於現屆梁振英政府，又引爆咗一個政治炸彈，民建聯周浩鼎俾梁振英，涉嫌企圖干預立法會調查UGL事件專責委員會研究範疇，建制派紛紛出嚟護航。（新聞連結： http://bit.ly/2rtuSvE ）

另一邊廂，退下立法會主席崗位嘅曾鈺成，繼《帶住矛盾去旅行》之後，再同ViuTV合作，拍攝咗全新節目《埋班》，有個前設：如果，係如果曾鈺成當選特首，會點組班呢？

早排《蘋果》得到呢個「新班子」名單，曾鈺成都幾有諗頭，除咗搵前立法會前議員鍾樹根出任文化局局長、藝人黃秋生掌管民政事務局，仲有搵田少田北俊做政務司司長。（新聞連結： http://bit.ly/2qxNOsM ）

呢個節目，下星期一就出街，咁啱得咁橋，第一集嘅嘉賓就請嚟「政務司司長」田北俊，ViuTV喺專頁更新咗條宣傳片，兩人仲去咗唱K，揀嘅歌都好有意思：哥哥張國榮同歌神許冠傑嘅《沉默是金》，嗰句歌詞「是錯永不對真永是真」真係百聽不厭，唔知係咪有心點唱俾梁振英同佢班幕僚聽，等佢哋講少啲當幫忙？

講番條片，平時喺立法會聽兩人講嘢就多，唱歌就好少喇，但曾鈺成同田少嘅歌喉......就不敢恭維喇，想聽清楚啲，就要留意番個節目喇！