將軍澳中心提供嘅回贈優惠噚日截止，除買家把握最後入市良機外，代理就更加唔會放過機會作最後衝刺。
個盤喺正地鐵站隔籬，一大班地產經紀圍住個地鐵閘口撈客呢招已經見怪不怪，噚日近百個代理「更進一步」入埋閘落月台守候，懶理地鐵公司不斷重複呼籲，禁止在地鐵從事商業活動嘅廣播，更加唔理過時出閘，會被罰最高車資26蚊嘅危機，總之為求達到鬥快搶客嘅目的，使盡渾身解數。
之不過一山還有一山高，有啲代理唔單止落月台，重搭多一個站去調景嶺，吼實班轉車客，但係好多時啲乘客都會極速湧過對面上車。蘭西睇到一幕，咁啱轉車去寶琳站架車未到，乘客排晒隊又好無聊之際，有個代理上前介紹個盤，傾吓傾吓架車埋站，個代理鍥而不捨跟埋上車，話唔定說掂個客，喺將軍澳站落車睇埋樓、簽埋單……
女人錢最易搵
喺經濟不景下女士們扮靚嘅心情及支出一啲都冇減低，商場大業主在零售市道疲弱下深明此道，搵番啲相關行業嘅租客。新世界尖沙嘴地下商場亞瑪遜（前名店城），自小熊國進駐之後，人流旺晒，8月嗰陣重有四萬方呎待租，現已租出三分一，剩番兩萬幾呎，平均呎租叫價四十幾蚊。近日獲得一家教女士扮靚美顏嘅公司洽租五千呎，睇嚟已傾得七七八八，好快開業。
利記港島東加人手
利嘉閣地產新董事廖偉強上場後，即進行多方改革，三大方向之一嘅王牌屋苑，頭炮係港島東區，即高級分行經理趙保杰嘅地頭。
現時利記喺呢區只有兩間分行，一間係太古城，一間係鯉景灣。聽趙保杰講，暫時會喺太古城分行加多一組員工，約五至六人。呢組會由啱啱生完一對可愛孖女嘅女將楊鷺梅統領。
今次變陣，利記希望可以將港島東區嘅市場佔有率由一成半提高到兩成。
寶德臺豪得低調鞏俐曾寄居
中半山唔係太出名嘅豪宅寶德臺，連續有兩宗租務成交，呎租成二十六蚊，重貴過區內名廈如花園台、愛都大廈同地利根德閣近排租值。屋之島梁佩儀話，寶德臺就係勝在夠低調，啱晒注重私隱嘅人住，好似大明星鞏俐年前就租咗上址頂層六千呎相連單位，月租閒閒哋十幾二十萬。成幢八十一個單位原來有一半以上由單一大業主持有出租，以單位市值每個千八萬計，呢位仁兄坐擁至少七億嘅豪宅物業，竟然無乜人識，貫徹物業低調嘅特色。
六十幾萬做半山樓業主
六十萬可以買到個半山單位，相信冇乜人信，不過，真有其事。最近利嘉閣拍賣會，有件堅道二十號七樓H室，實用面積接近四百方呎，都唔算太細，開價四十萬，每口叫價一萬，一直爭持到六十萬，就降為每口三千蚊，最後以六十萬三成交，每呎僅逾千五。不過，單位已經有四十二年樓齡，而且重係冇𨋢個隻，抵唔抵就見仁見智。
聽講呢件貨執一執之後，好快租出，回報率幾近七厘，唔算太差。所以，唔少投資者都吼實，睇吓邊度有筍貨。