點知個主持人答得好妙,呢啲係二○二○,即十五年後嘅事,到時先至算啦!但係呢番話就聽到班新人類好刺耳,原來政府高官諗嘢係咁嘅,十五年後佢哋班高官自己都退晒休,𠵱家唔使諗咁多,費事煩自己。而且立法會議員關注嘅係𠵱家嘅高官退休後出外打工,會唔會有利益衝突,將來點樣唔會有人理。唉!真係一貫嘅官僚作風。
呢單嘢嘅迴響就好大,喺班新人類之間廣泛流傳,有人打電郵狂鬧平叔個局,真係反映晒高官做嘢嘅心態,可以唔理唔做就唔理唔做,教壞晒班師弟妹。
八方都感慨,煲呔成日話政府政策係要有持續性,但係高官就自己顧自己,香港嘅未來,唔關我事!
講開公務員事務局,八方有日撞到立法會議員張文光,佢話公務員人數已經減過指標,不過佢哋都唔會輕易畀政府開新位,特別係高級位置,不過,如果周一嶽個部門為咗公共健康、為咗對付新疫症如禽流感要開位,班議員都唔敢太阻撓,因為唔批而出咗事,邊有人孭得起?
傳真︰2623-9278
電郵︰
[email protected]