有13年潛水經驗嘅余曉彤（Hidy)，近挑戰高難度，同吳京主演電影《戰狼》嘅編劇劉毅，日前組織咗探險隊，一行人噚日朝早去咗安徽省黃山嘅太平湖尋找水底千年古城，Hidy都係大隊成員之一，活動完畢，Hidy噚晚喺「山竹」逼近香港前趕回來。

Hidy話為咗呢次挑戰，出發前做咗少少訓練，佢今日接受《蘋果》電話訪問時話：「岀發前喺香港接受咗幾日訓練，一直潛咗好多年水，但技術潛水呢種極限運動，係需要嘅技術更嚴格，通常技術潛水都會潛一啲比較險峻嘅地方，例如洞穴或船艙，似探險咁，好似上次泰國少年足球隊被困，就需要技術潛水員去救援。」

Hidy話今次團隊特別安裝咗水底通訊器同器材，方便隊員喺潛水期間進行水底直播，Hidy話：「感覺好刺激，我哋探險隊亦成功搵到上世紀20年代中國第一水泥公路橋，即永濟橋，成功將歷史畫面現場呈現喺網絡同大家分享。」

問到Hidy呢次潛水感受？佢話：「我其實喺落水前都有擔心，因為第一次水底探險，第一次雙瓶潛水，而且嗰度水底能見度好低，只有半米。但下水後感覺就好刺激、好有趣，潛嘅地方係古城，都充滿歷史故事。雖然一度唔見咗同伴，但憑自己咁多年潛水經驗，都識冷靜處理，最後搵返佢哋。潛完仲鍾意咗水底探險同技術潛水，返嚟會再繼續訓練，繼續去探險。」

有份籌辦呢次嘅《戰狼》編劇劉毅，曾喺戲中加入水底拍攝元素。Hidy呢次跟劉毅團隊去探險係一個好經驗。

山竹襲港，Hidy自爆曾試過3號風球下喺西貢進行潛水訓練：「嗰次都驚，但已出咗海，好快同安全下完成，不過始終打風係要停晒所有水上活動，真係好危險。」

精選娛聞，喺晒《娛果》
http://fb.com/appledailyent