34歲嘅台灣女星楊丞琳（Rainie），同細1年嘅男友李榮浩，拍拖3年多，舊年李榮浩喺演唱會上，霸氣強吻佢臉頰，愛得高調。早前晚上，《台灣蘋果日報》喺台北東區街頭巧遇楊丞琳嘅座駕，佢嘅司機將車駛往一間日式餐廳，着住淡藍色寬鬆上衣配寬褲嘅Rainie，入到店內同一名四眼男友人會合，兩人一見面就鷄啄唔斷，睇嚟交情匪淺。

其實出道超過17年嘅楊丞琳，佢嘅容貌、身材同剛出道時相比幾乎係凍齡，當晚坐喺窗邊，只化淡妝嘅佢，竟然出現黑眼圈，見佢慢慢飲湯，同男友人不斷討論事情，唔知係咪講到秘密嘢，Rainie靠向男友人耳邊細聲講，對方亦好耐心細聽，不時畀回應Rainie，傾傾吓見Rainie亦笑得開心。

將於下月6日喺高雄巨蛋舉行「青春住了誰演唱會」嘅Rainie，近期又要為大陸節目《新舞林大會》錄影，經常兩邊飛頻頻撲撲，幾忙都抽時間搵朋友食飯。食完飯，見Rainie搶先去櫃位畀錢埋單，之後上車離開返回木柵嘅住所。當晚飯後Rainie亦喺佢IG貼上與男友人嘅合照，原來Rainie呢位男友人，其實係藝人金勤，佢曾演過電視劇《孽子》及電影《17歲的天空》等，除咗係演員亦係表演老師。

事後記者致電Rainie，其經理人表示：「這是私人聚會，好朋友聊天如此而已。」其實楊丞琳同金勤，拍偶像劇《愛就宅一起》而認識，至今相識有10年，有時Rainie喺演戲上遇到瓶頸位，會向金勤請教，難怪佢曾讚金勤係「全面性的好朋友」，就連佢嘅專輯《年輪說》中嘅歌曲《我們》，都係Rainie送畀金勤等好友嘅歌，其交情不言而喻。

精選娛聞，喺晒《娛果》
http://fb.com/appledailyent