JW、陳明憙同陳柏宇等，今日到樂富出席港台主辦嘅「平等機會多元共融行動」，其中曾留學英國嘅JW，問到喺外國求學期間，有冇遭受過種族歧視？佢話：「我好好彩未試過，我喺英國一啲比較郊區嘅地方讀書，當地同學全部都好Nice，我嘅經驗其實只要你唔好怕醜，主動少少同大家傾偈，去融入大家嘅生活，就好少有問題出現。」

咁JW自己有冇見過其他同學仔遭到歧視？佢話：「好彩都冇，不過有時會見到同學仔會笑其他同學，我都唔鍾意，會出聲阻止叫佢哋唔好。」

至於工作方面，佢話近來積極搵緊歌：「我有四個主題想寫，但係未講得住，已經努力物色緊Demo。」四個主題係咪全部都關男朋友（Tarzan）事？ 佢笑笑口話：「唔係呀，我已經成日唱歌畀佢聽。」佢仲話男友好鍾意聽佢唱歌，經常都主動要求JW唱歌俾佢聽。咁平時喺男友面前會唱啲咩歌？JW話：「因為其他人嘅歌我會成日唔記得歌詞，所以我都係唱番自己歌畀佢聽。」

精選娛聞，喺晒《娛果》
http://fb.com/appledailyent