【意外受傷】古天樂用風褸笠頭再推埋牆 宣萱：聽到自己條頸啪一聲
蘋果日報 2019/09/16 14:24
犯罪現場宣萱古天樂
古天樂與宣萱繼電視劇《尋秦記》後，相隔多年於懸疑電影《犯罪現場》再度合作，電影下月底上映，不少觀眾都期待他們的演出。多年後再次走在一起，鏡頭前後也不失默契，戲中古仔要對宣萱痛下殺手，從後用風褸笠住她的頭，再用力推她埋牆邊，結果不慎弄傷她的頸，幸好並無大礙，事後宣萱笑說：「我唔會怪佢，OK嘅！佢會萬歲㗎喇！」
古仔坦言拍攝時過於肉緊，本來打算分開幾場戲拍攝，但導演建議二人嘗試一次過完成所有鏡頭，當時導演特意叫宣萱先試一下，如果辛苦可以叫停，結果她忍痛完成整場戲。古仔大讚宣萱專業：「我有同佢講你一唔得就嗌cut啦！咁佢真係好好嘅，成程都冇嗌cut，因為大力chok住條頸點都會痛，但係佢就好堅持忍住做落去，係幾驚喜。」
受傷後，宣萱在看回該場拍攝片段期間，需要用冰毛巾敷頸，她笑說：「其實拍之前我驚咗好耐㗎喇！因為我太了解佢（古仔），好驚呀！同佢拍打戲。」原本該場戲有為她準備替身，不過宣萱要求親自做，她表示：「導演同古仔建議我不如自己做埋啦！我都覺得咁樣真係會靚啲，成件事一個鏡直落smooth啲。」但拍攝途中，她聽到自己條頸發出「啪」一聲時，已心知不妙，但依然堅持下去：「橫掂都啪咗聲，所以一定要頂埋去，做埋場戲，都叫做犧牲得值啲嘛！」
宣萱更幽默說：「本身兩個禮拜前我都約咗要正骨嘅，而家古仔幫我啪歪咗，再去整翻好，好似會抵啲。」問到受傷後，古仔有否表示關心?宣萱即壓低聲線模仿古仔：「上去敷冰啦！」
古天樂這個推動作戲，令宣萱頸部受傷。
宣萱即用冰敷鎮痛
古天樂和宣萱重看拍攝過程
戲中也有親密時刻
相隔18年再合作，默契依然，鏡頭外溫馨的一面。