左麟右李演唱會2013將於12月喺紅館舉行，今日譚詠麟（阿倫）同李克勤喺尖沙嘴舉行記者會，兩位穿上筆挺西裝，各自企喺辯論台上，似足之前特首之戰辯論，阿倫笑言：「今日開始賣飛，可能會引發好多社會問題，要大家排隊，大家唔好排錯隊拎咗表格喎。」

克勤就話：「周啟生話開演唱會係回饋社會，咁我哋要開多幾場。」阿倫就答：「佢之前番說話都幾發人深醒。」兩個人你一言我一語，之後又有兩條舞龍出現，阿倫笑指：「嘩！真係有雙龍出海喎。」克勤就踢爆：「03年嘅時候，阿倫真係提議過個演唱會叫雙龍出海，後來畀左麟右李打敗咗。」

佢哋話今次主題係香港有聲音，又話香港人基本上係開心嘅，但比太多問題壓住，所以今次演唱會希望將所有歡樂從大家心底搵返出嚟，兩個人仲會秘密練功，克勤話：「呢樣嘢唔講得住，但一定做到驚嚇效果，嚟睇演唱會就知。」唔係又練大隻啩！？