【新增回應】

由「話題編導」岑應製作嘅大台實況節目《有樓萬事足》，今晚首播，內容係圍繞時下青人面對上車買樓問題，繼有23歲、自稱做文員嘅「105%姐」Macy，自爆衣食住行chur盡屋企人同男友資源，自己就做孤寒精，每月儲足105%人工，仲炒股票個個月儲凸人工，Macy用咗335萬喺旺角買咗細單位，佢勵志個案受到網友惡評。

其實節目中仲有個同佢不相伯仲，慳到離晒地嘅「50蚊哥」岑先生，做過教師嘅佢，想當年堅持日使僅50蚊，儲咗8年，10年成功用600幾萬買咗西半山一個600呎單位，佢仲畀咗一半錢做首期，o依家層樓升到800幾萬，呢位「樓奴」教大家為層樓可以斷絕一社交。

岑先生今日接受《蘋果》電話訪問，佢話：「我嘅慳錢方法係大學生時做起，我課餘會善用學校資源，多啲返學校做運動，食飯又去學校canteen食廉價飯，平時唔去唱K，唔亂洗錢，好慳。」岑先生話呢個慳錢法至啱學生同單身人士，佢話o依家有咗家庭同小朋友，只有慳自己，闊綽妻兒。

《有樓萬事足》中連日畀網友喪鬧嘅極品拜金「高潮女」Seasun，佢噚日預告話唔會今晚睇節目，佢倒米話：「睇重播算了。」慣於跳掣嘅Seasun今日又改口：「我一定唔會喺多人地方睇，萬一有高潮起上嚟，一人一粒花生都掉死我。」「105%姐」Macy見到網友係咁畀負皮，佢立即玩潛水，怕被起底，連facebook都鎖起。