已經喺加拿大定居嘅黃凱芹（Chris），最近為咗宣傳新專輯《煇黃時期》同嚟近與二胡家王憓合作嘅演唱會，返咗嚟香港幾日，前晚仲參加咗無綫鄭少秋、汪明荃嘅節目。

本來佢明日仲會幫無綫一個名為《StarTalk》嘅訪問環節錄影，點知Chris今日上晝，突然嬲爆喺微博貼長文，話會辭演呢個訪問，原因係覺得不被尊重，甚至覺得節目問佢嘅問題，有百分之七十係人身攻擊、抹黑、踐踏、揶揄、歧視、侮辱等等嘅負面能量，Chris仲原文貼咗有關方面畀佢嘅問題出嚟畀網民睇。

Chris仲話，佢一直對於唔尊重藝人、音樂人、任何人、甚至帶有種族歧視色彩立場同定位嘅邀訪都唔會接受，而佢今次就覺得成個訪問嘅意欲同企圖都好曖昧，佢唔想送羊入虎口，唔想見到唱片公司為咗多賣幾張唱片而卑躬屈膝為佢去自投羅網。

Chris嘅歌迷當然力撐偶像，但無綫一位主播張景涵就唔多認同佢嘅講法，喺微博回應Chris：「又何必難為別人？又何必如此負面。」更公開向Chris解釋問題並無不敬之意，仲話觀眾都熟悉喬寶寶，「人有相似」係讚佢keep得好等等。不過，佢隨即便被Chris嘅歌迷鬧爆，話佢哋冇職業道德。

Chris公開節目訪問稿節錄：
1.近年有唔少人覺得你同喬寶寶個樣有幾分相似，你介唔介意人哋咁講？
2.你覺得自己同喬寶寶個樣有幾多成似？
3.記得有本雜誌曾經幫你改過一個名叫「咖哩王子」，你會唔會抗拒俾人咁叫？
4.傳聞有「咖哩王子」呢個名，因為當時同周慧敏傳緋聞，你點形容當時你同周慧敏關係呢？係咪真係有喜歡過呢位小師妹？