當年今日
關於我們

【李八方online】建制擬使橫手開會講教材 葉劉想做關鍵一票面懵收場

蘋果日報 2020/06/05 13:08

葉劉淑儀教育事務委員會教材編製小組委員會

立法會教育事務委員會成立咗「研究幼稚園、中小學教科書及教材編製小組委員會」,但開咗兩次會都仲未選到主席。教育事務委員會今日開會,民建聯張國鈞要求開特別會議討論教材問題,本身有權自己決定開唔開嘅主席葉劉淑儀,無啦啦話要委員表決,點知最終12比12打和。本身無舉手嘅葉劉一度話「加埋我自己」就有13票贊成,畀副主席葉建源踢爆主席係無決定性表決權,葉劉最終面懵懵話自己無投票,議案亦無通過到,就轉話題去下一項議程。

「研究幼稚園、中小學教科書及教材編製小組委員會」開咗兩次會,都係由街工梁耀忠主持主席選舉,但係至今都仲未選到主席。民建聯張國鈞就去信教育事務委員會,要求開特別會議討論教材問題,惹來泛民群起反對。民主黨黃碧雲就話,既然已經成立小組就應該喺小組討論,無理由教育事務委員會同步安排會議傾,質疑咁樣係不合規矩同程序。

教育事務委員會主席葉劉淑儀就話覺得有迫切性,佢自己都收到好多家長投訴之類,然後就話要委員就開唔開會表決。工黨張超雄即刻出聲質疑,張國鈞根本就無動議,點解要表決呢?議會陣線毛孟靜都質疑程序有問題,委員會唔可以喺無動議嘅情況下投票,「動議內容係咩呢?投咩票呢?邊個提出呢?」

雖然受到泛民質疑,但葉劉都係堅決要委員舉手投票,決定開唔開特別會議討論教材問題。不過,最後投票結果係12票對12票,本身無舉手嘅葉劉一度話「加埋我自己咪13位」,話自己可以投決定性一票。但係副主席葉建源就出聲,話主席如果投票應該係反對票,葉劉就話葉建源錯,話「主席手冊講明」佢有權,葉建源就叫葉劉「將嗰段讀出來」。

葉劉於是讀出《主席手冊》有關主席表決權嘅段落,「主席或主持會議委員,享有原有表決權,但沒有決定性表決權」,然後就改口話「我無投到,我亦都唔會投,只不過我話我可以投咁解啫」。葉建源即刻「補刀」,話議案係無通過到,葉劉惟有都話「無通過到」,然後就轉話題講下一項議程啦。

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
《囚牢之疆》 專頁
揭開集中營邪惡面紗
獲2020年人權新聞獎「多媒體(中文)」大獎
-----------------------------
App內1-Click訂閱《蘋果動新聞》
按此了解更多