【確認離巢】三個齊出走 S.H.E會否解散?華研:仍在討論中
Selinaella解約hebe華研陳嘉樺SHE田馥甄離巢任家萱
台灣組合S.H.E喺本月11日先舉行完成軍17周年紀念演唱會「十七音樂會」,演唱會尾聲時,3名成員任家萱(Selina)、田馥甄(Hebe)及陳嘉樺(Ella)攬住喊,又同歌迷約下「明年見」(新聞連結: https://bit.ly/2zs3swe )。
正當大家等緊S.H.E「成年」之時,今日又傳嚟震撼消息,指繼7月盛傳Ella離開華研國際,改為由老公賴斯翔任顧問打理其演藝工作(新聞連結: https://bit.ly/2M42El6 )之後,Selina同Hebe都會喺今個月約滿後離巢華研國際,各自分飛。佢哋所屬嘅唱片公司華研稍後承認S.H.E嘅3位成員會各自成立個人公司,未來嘅合作仍討論緊。而華研嘅股價疑因消息影響受挫,今日股價最低跌至每股98.1元新台幣(約24.9港元),創21個月來新低,市值蒸發逾11億元新台幣(約2.79億港元)。
據台灣《蘋果》報道,Ella老公賴斯翔早前辭咗原本嗰份工,以Ella專屬顧問喺華研國際為Ella把關,而佢已註冊成立「勁樺娛樂有限公司」,就係為Ella度身訂造嘅公司,預備喺10月起,幫Ella打理演藝業務。
至於Selina同Hebe將會步「老婆」Ella後塵,離開華妍,不過就未有消息指佢哋會跟埋Ella過檔。
S.H.E嘅3位成員同時離開華研,對公司打擊相當大,單係Selina舊年有七個代言,估計收入達6,000萬新台幣(約1,526萬港元);而Hebe仲犀利,有11個代言,廣告費逾億新台幣(逾2,544萬港元),粗略估計,S.H.E舊年幫華研賺咗逾4億新台幣(約1億176萬港元)。早前傳Ella離巢時,華研嘅股價已經一度受挫大跌,如果佢哋三個離巢,華研如同失去三隻會生金蛋嘅鵝。
不過,亦有指因為「S.H.E」呢個組合名係屬於華研嘅,如果第二日Selina、Hebe同Ella要合體用組合名的話,可能都要同華研傾。而當初傳單飛唔解散,三人都話彼此係一家人,留晒「後路」,所以亦唔排除將來有合體嘅可能。另外,有指Selina預計年底出碟,但早前因為把聲出事,o依家仲加多樣合約問題,有唔少歌迷都擔心Selina隻碟係咪可以如期推出。
關於S.H.E嘅合約問題,唱片公司回覆:「三位成員與本公司合作尚未屆期,接下來三人將各自成立個人公司,未來期間合作內容仍在討論中。」疑受S.H.E離巢消息影響,華研股價受挫,今日盤中最低價跌至每股98.1元新台幣(約24.9港元),創21個月來新低;若以華研股本5.44億元新台幣(約1.38億港元)估計,華研市值由逾65億元新台幣(約16.53億港元)降至約53億元新台幣(約13.48億港元),市值蒸發逾11億元新台幣(約2.79億港元)。
精選娛聞,喺晒《娛果》
http://fb.com/appledailyent
S.H.E繼Ella(右)後,今再傳Hebe(左)及Selina會相繼離巢。(台灣《蘋果日報》)