【新增回應】

早前揭發大埔定慧寺混賬嘅翁靜晶，除咗有正義感，仲好有愛心。本身養咗15隻貓嘅翁靜晶最近到外地旅行時，遇上兩隻喺天寒地凍遭冷血主人棄養嘅狗狗，雖然親友勸佢送去收容所，但就因為翁靜晶嘅善心，最後決定領養，並將為白狗（Jack/91）同黑狗（Black/92）一齊申請「狗移民」手續，幫佢哋入籍香港。

翁靜晶今日回覆《蘋果》，透露兩地手續已開始進行中，好順利，但機票價錢幾貴，佢話：「貴過人好多，但佢哋好似難兄難弟，兩隻仔好難分開佢哋。而佢哋都好黐我，已得到佢哋信任，如果我唔要，佢哋就再次被人類出賣。我已經有15隻貓、一隻狗同一隻雀，哈，我都唔知點算，未來我會盡力安排貓狗共處，但點都唔會放棄。」

事緣翁靜晶噚晚喺facebook發帖稱，2018年嘅最後一日發現兩隻狗狗，天寒地凍拍着玻璃門哀求半刻溫飽，佢曾經有過一刻猶豫﹕「是否應該將他們引進室內？萬一他們有疾病、有細菌，那不是很危險？再說，他們有瘋狗症又怎辦？內心鬥爭了幾分鐘，作出了重要的決定，我願意承擔這個風險。」

翁靜晶覺得養小動物係一生一世嘅照顧，唔係喊句口號咁簡單，佢話：「天寒地凍被困籠中，無止境地等候別人領養。牠們相依為命，想到牠們有機會被分開領養，我警告自己—-假如我將牠們送去收容所，我今後也不需要再拜佛了。『阿彌陀佛、一毛不拔』，這與政黨喊口號有甚麼分別？」

「我承諾，只要我一息尚存，無論牠們有多老、有多病，我都不會離棄牠們。我決定不惜一切，也要將牠們帶回香港。金錢可以慢慢再賺回來，情義卻是千金不換的。」

翁靜晶還上載咗兩隻狗嘅近況，帶佢哋見咗獸醫，再去美容院扮靚靚，由青蛙變成王子，大家同床共枕，真係好warm。翁靜晶話：「這個故事，卻並不是美女拯救了野獸，而是野獸將我內心的美女打救出來。感謝上天給予我這個機會，願普天下的毛孩，帶給我們至善至美。」

唔少網民都被翁靜晶嘅善心所感動，留言：「好感動的相遇、兩隻小狗終於搵到有愛心的主子，會幸福的」、「謝謝你嘅拯救、能做到你這樣實在不容易，佩服佩服」、「好彩遇到你」。

精選娛聞，喺晒《娛果》 http://fb.com/appledailyent