中國噚晚喺長沙背水一戰，亞洲區世盃外12區賽生死戰擊敗南韓1:0，力保晉級希望；國內傳媒當然一片唱好，其中《新浪體育》豪言戰勝南韓之後「已經沒有甚麼可怕的」，而大軍今日喺長沙進行最後一堂操練後，就會直接由長沙坐包機前往德黑蘭，備戰下周二作客伊朗嘅大戰。

不過，伊朗理得你甚麼「國家最需要時贏了」、「贏回一球贏得13億心」之類嘅厥詞，周四世盃外作客憑中場德利米一箭定江山，1:0險勝卡塔爾，A組6戰得14分繼續排榜首，出線世盃機會可謂高唱入雲！同組另一場，飽受戰火摧殘嘅敍利亞雖然要移師中立場作賽，但佢哋憑前鋒卡爾賓補時12碼冷靜chip中間射入，以1:0絕殺烏茲別克，6戰得8分排第4，保持出線希望。