【珍惜眼前人】薛家燕仍未接受炳哥離世：突然間冇咗好唔慣
蘋果日報 2020/09/10 15:26
追思會薛家燕
「配音王」譚炳文上周六因肺癌離世，享年86歲，炳哥的追思會及設靈將於9月21日在紅磡世界殯儀館舉行，他的女兒譚淑瑩昨日到長生店處理亡父的後事，並透露選了爸爸生前喜歡的西裝作壽衣，還有夏威夷裇衫及羽絨外套陪葬。
與炳哥生前份屬好友的薛家燕，昨晚以一身黑色長裙錄影《流行經典50年》，並在節目上錄了一段對白向炳哥致敬，家燕坦言NG了很多次：「頭先錄影有一段對白係講炳哥，都錄咗6、7次，真係好大嘅感觸，每一次講嘅感覺都唔同，講講吓嘅心情都激動，尤其係講到父慈女孝嘅時候，諗番起瑩瑩陪住爸爸出出入入醫院嘅情形，好多畫面出晒嚟，真係講唔到。」她還說：「我接受唔到佢突然間離去，喺呢2年，每朝早都會收到炳哥嘅問安嘅短訊，而家突然間冇咗，真係好唔慣，原來一剎那係可以冇咗自己敬愛嘅人，真係要珍惜所有眼前人，希望炳哥一路好走，我係有少少失落。」
家燕姐透露瑩瑩邀請自己為炳哥寫悼念詞：「佢知道我同炳哥識咗好耐，所以都我寫番對炳哥嘅感受，但係我未諗到由邊度開始寫，而家構思緊。」至於李香琴是否已經知道炳哥離世？家燕姐說：「唔知道琴姐嘅屋企人有冇同佢講，可能唔想話畀佢知，唔想佢傷心同難過，畢竟係好拍檔。我都有勸瑩瑩要堅強，節哀順變，我知她好錫爸爸。」
家燕姐一身黑衫悼念炳哥。
家燕姐表示仍未接受炳哥的離世。
家燕姐勸瑩瑩要堅強，節哀順變。
-----------------------------
《蘋果》英文版免費試睇：了解更多