減稅，講就講咗好耐。有唔少香港人，亦都開始明白到，再唔減稅，啲錢最後都會畀特區政府大花筒，使亁使淨，與其畀啲官僚將大家辛辛苦苦搵嚟嘅錢，亂咁倒入維多利亞港，不如將啲錢留番畀自己，使都使得稱心滿意。
不過，特區政府永遠都多多理由，一時又話衰退未結束，嗰頭又話要準備下次衰退。老實講，衰退結束未，真係口同鼻拗，等你班蟻民慢慢拗，高官又可以過骨囉！舊年個市，好到啲官都冇可能再擘大眼講大話，咁佢哋就惟有改口，話要準備下次嘅衰退，呢啲嘢你點同佢拗呀，大佬！

大家可能唔記得，03年偷步阿松話政府有赤字，所以要加稅。當時利世民仲未加入傳媒，所以冇機會狠批呢單嘢。不過，咁多年嚟，竟然冇人踢爆呢個謬論，世民就惟有趁「唐搪」聽日公布預算案，幫大家溫故知新。
政府有赤字，市民就更加肉赤。嗰陣時要加稅，完全係因為政府回歸後瘦身不成，所以就算民不聊生寸草不生，政府都要加稅，以保住官僚嘅飯碗、豐厚嘅福利、跳Point加人工嘅人權同高高在上嘅尊嚴，其他人就抵你死話之你，鬼叫你唔做公務員呀！再者，政府用錢唔會推動經濟，03年之後香港經濟反彈，完全係因為格林斯潘減息咋，你班港官正視歷史啦！唔該！
納稅人錢就畀足，不過又得到啲乜呢？醫療搞得唔好，撥多啲錢囉！教育搞得唔好，撥多啲錢囉！官僚淨係識得「撥多啲錢」，但永遠就唔識有效管理。其他官僚如果要為部門攞多啲錢，你估佢哋會將部門搞得好啲，定係搞得差啲呢？大家𠵱家明白點解水頭越充足嘅部門，管理通常越差，乜嘢係因，乜嘢係果。而且結構性財赤，都已經唔存在啦，唐英年又等乜呢？等曾蔭權連任囉！