恒指昨倒水下跌，今日則反彈超過500多點。記者今日到九龍灣證券行直擊，有散戶指自己輸好多，不願上鏡，「怕俾呀女鬧」。她指自己「買咗就跌，放咗就升」，即使今日大市曾升逾500點，仍會觀望一下再入市，「唔敢買住，等佢跌返先啦」。

炒股經驗達30多年的許婆婆指，未來投資重點會慢慢轉移至穩陣的大藍籌。她指自己輸的「冇得計」，又指現時香港股市跟着大陸走，「依家好難炒」。「俾大陸入咗嚟（港股），好難炒，仲輸得多。」她指自己手上有幾隻停牌的股票，價值10多萬元，但苦等三個月至半年都尚未解封，自言「有呢幾隻都死」。

許婆婆鍾情港燈（2638）和煤氣（003），指「隻隻都衰，係呢幾隻冇衰」。

記者：劉曉鳴