韓國女團TWICE台灣成員周子瑜，近日因「黃安之亂」而成為新聞人物，而跟子瑜係JYP同門嘅韓國男團DAY6，噚晚就喺風頭火勢之下於九展MusicZone舉行首次香港演出，但就絕口不提子瑜單嘢。

DAY6六名成員Jae、晟鎮、晙赫、YoungK、元弼同度雲一出場就引來粉絲瘋狂尖叫，佢哋連唱多首歌曲，甚至演繹師姐團WonderGirls嘅名作《Nobody》另一版本，為粉絲帶來驚喜。隊長晟鎮表示佢哋準備緊新碟，而喺互動環節時，YoungK仲即興唱出心情，大讚香港嘅點心同蛋撻好食，而Jae亦用英文唱出冇得去迪士尼樂園玩好慘慘豬。

尾聲時，DAY6唱出《Congratulations》，點知唱咗幾句就轉channel，由隊友帶領全場粉絲唱韓文生日歌為翌日（今日）生日嘅晟鎮慶祝，晟鎮見到生日蛋糕好開心，笑住話唱唱吓歌咁樣做好唔專業，但佢轉頭又要求全場唱多一次生日歌佢聽，認真搞笑。