唔經唔覺，《初戀無限Touch》已經推出咗二十年，呢套經典港產愛情片，刻劃咗初戀嗰種忐忑不安嘅心情，引起好多少男少女共鳴。

但講到最肉緊，當然係陳曉東飾演嘅「雞康」，同埋梁詠琪飾演嘅「阿塔」呢對小情人嘅感情關係啦！

事隔二十年，雞康同阿塔終於「Re-U」啦！東東同GiGi陣間就會亮相《蘋果》娛樂直播節目《今日ENT》，同大家玩Live同分享吓當日拍攝時嘅點滴。

係咪好心急想留言呢？咁就要記緊留意今日下午一點鐘嘅《蘋果》facebook Live啦： https://www.facebook.com/hk.nextmedia/?fref=ts

佢哋喺chit chat中，講番1997年拍呢套戲，就話之前約咗好多次，不過因為大家都忙，所以o依家先見到，東東就話見番GiGi：「當時都拍得幾enjoy，因為拍戲經驗少，拍初戀劇，易代入去。」GiGi就話現時大家做咗人哋爸爸媽咪，諗起初戀好似幾遠嘅事，入行比較早，所以17、18歲就拍戲。

對於大家都覺得佢哋似樣，GiGi認為分開睇，就覺得佢同東東係似，但一齊睇，其實二人唔似，GiGi自嘲可能自己女生男相，東東解釋：「我覺得點解會覺得似，因為五官都似，比較集中。」總之大家都靚仔、靚女。

GiGi又話o依家比較大年紀，拍續集再叫初戀，佢有啲抗拒，不過東東覺得佢哋都未算老，可以拍到，佢哋討論完一輪講番《初戀無限Touch》個結局，GiGi都認為呢套戲應該唔好拍續集，因為咁先完美。仲想知更多，就快啲睇live。