九龍樂善堂《危城》慈善首映禮噚晚喺九龍灣展貿舉行，導演陳木勝、演員劉青雲、古天樂、彭于晏、袁泉、廖啟智、姜皓文和釋彥能出席。

彭于晏喺新戲對住兩位前輩劉青雲同埋古天樂，佢話好開心同兩個自己喜歡嘅前輩合作，但係就有啲壓力，唔知係咪因為有壓力，所以佢話自己拍戲嗰時不停講野，但係廣東話依然係冇進步嘅，下次佢會好好聽人講，好好咁學習。

咁前輩劉青雲對呢位超級新星又有咩評價先？彭于晏聽唔聽話？青雲好簡潔咁話：「佢好有自己個性。」咁即係唔聽話？青雲話：「唔可以咁講。」咁即係點呢？大家自己諗下。

青雲話今次拍戲都好多打戲，不過唔算太辛苦，但係短期內唔會拍住：「拍動作片要時間練功。自己比較鍾意休假。」問到豪宅裝修進度？佢話：「屋企唔裝修，都會休息，我好鍾意放假，不過之前都返大陸拍咗套戲，嗰度37度，工作人員驚我哋中暑，買藥俾我哋食。」又講番間屋，佢話：「之前打風落雨，如果唔係進度會快啲。」咁裝修係咪老婆郭藹明搞？佢話：「唔係，大家有商量。」

古天樂聽到劉青雲講放假，佢都話想放，但係放唔到，佢話：「3、4年冇同屋企人去旅行，不過之後又要宣傳，如果去又要考慮會唔會坐長途機，去過嘅地方又會投訴成日去，問過青雲去睇動物大遷徒，但係要一年前BOOK定，我都唔知一年後有咩做。」