【新增回應】
韓國天團BIGBANG嘅G-DRAGON（GD）今年2月入伍，雖然入咗伍，但是非依然不斷，噚日韓媒《Dispatch》就爆料指享特權，報道指GD因右腳踝腳踝關節痛到國軍楊州醫院接受治療，留院10日獲厚待入住上校房。（相關新聞連結： https://bit.ly/2yHwiu7）

隨後軍隊方面及GD所屬嘅YG事務所都否認GD享特權，指楊州醫院冇上校房，不過今日《Dispatch》方面就繼續咬住GD唔放，指楊州醫院確實存在上校房，當中指病房區分中存在上校房間嘅證據，又指向喺醫院工作嘅人求證，確實有上校存在，但現時GD已搬離上校房，同時又爆GD於兩個月內請咗33日假。

對於再被《Dispatch》指有上校房存在，軍隊方面同噚日一樣，強調並唔存在上校房。

另外，由於噚日網上流出疑似GD嘅病歷，當中包括GD身上嘅紋身位置、痣及常服用嘅藥物等，令到網民關注藝人私生活難受保障。

而軍隊人權中心今日亦發表官方聲明，否認GD享特權，軍隊人權中心於官方網站表示：「經過確認後，GD的確於5月初因為接受身體治療而請咗20日病假，接受手術，之後住院治療。新聞報道中有著不符事實嘅誇張內容。楊州醫院不存在上校房，只係於三樓有兩間單人房，一間係VIP室，一間係普通單人房。GD所使用嘅係冇電視嘅普通單人房。該病房以前曾有士兵、副士官等人使用過。VIP室並唔係正式存在，內部來說係由上校及軍官使用。但係實際上上校及軍官並唔常使用軍隊醫院，因此病房於大部分情況下都係空著嘅。」

國防部下午亦作出回應，指GD於4月時請咗3日假，5月請咗17日假，6月請咗6日假，但就未計埋GD上周二開始放嘅病假，同時否認GD入住VIP病房。

對於《Dispatch》咬住GD唔放，唔少GD粉絲都非常心痛偶像，噚日起於青瓦台請願網站發起「廢除《Dispatch》」嘅請願行動。

更多韓流，喺晒《娛果》
http://fb.com/appledailyent