訪港旅客大減，海洋公園面對遊人少咗嘅挑戰，隨住港鐵海洋公園站通車，應該多番遊客，原來車站設計仲有風水玄機。
八方發覺車站連接公園嘅天橋，橋蓋係波浪形，問精通風水玄學嘅公園園內營銷執行總監梁啟誠Joseph，係咪有玄機。佢透露，早喺2006年設計公園站時，已開始諗點配合公園風水。列車由金鐘駛入南區時，係由右邊車軌駛進左邊車站，玄學上叫「右水倒左」，象徵帶嚟財富。

「天橋畀乘客行去海洋公園，亦喺風水上引水嚟公園」，佢話天橋設計波浪形，「叫九曲水，係（玄學上）水法嘅其中一種」。
乘客離開天橋就會去到Security Check，該處上蓋除咗免保安遊客日曬雨淋，亦都有玄機，「你睇吓（上蓋）個設計似唔似豬籠？」佢話豬籠就係用嚟裝住車站引入嚟嘅水。　最後，啲水去咗邊？Joseph話公園閘口前，有個小噴水池，入園後亦有一個大水池「夢幻水都」，玄學叫「明堂有水」用嚟裝起晒啲水（財）喇！
咁海洋公園咪賺晒？遊客呢？Joseph話水代表財富，亦象徵福氣，所以風水陣亦將福氣帶到南區，有利居民及入園遊人，加上香港正行八運，帶旺南區亦有助整個香港嘅運勢喎。