方健儀今日去到到灣仔為婚戒專門店開幕擔任司儀，大會又邀得漫畫家Cuson及其太太CaCa、中韓混血兒家庭分享夫婦相處之道。

講到噚晚《毛記電視》台慶，唔少網民都覺得比上次《勁曲金曲》差好遠，錯cue，overrun，多deadair等等製作上嘅問題真係好多，作為《毛記》「開台元老」嘅方健儀就表示:「我有部分時間去咗後台做訪問，不過之後坐返出去睇，覺得現場氣氛好好，大家都好投入。可能《勁曲金曲》呢個珠玉在前，做多啲咪得囉，腦細（林日曦）唔使灰心，正、負面comment都好，身邊總有人會支持。」

方健儀又話最近多司儀工作，有唔少客戶係再度合作：「有人返轉頭搵，我覺得係工作上肯定，好開心。」再講返夫婦相處之道，方健儀笑指同丈夫嘅生活非常平淡：「係淡如水，但係窩心。早幾日我好忙，好想發脾氣，佢突然會話第二日車我返工，兩夫婦相處耐左會心靈相通。」