【新增動新聞】
勇士復仇成功擊敗騎士，三年內第二度封王！周一NBA總決賽Game 5，勇士回師Oracle Arena出擊，上半場曾經陷於劣勢，但憑住第二節中後段打出36:11嘅攻勢奠定優勢，最終憑杜蘭特（Kevin Durant）攻入全隊最高39分下力保129:120勝局，總場數4:1封王，繼2015年後再度稱霸，亦報卻去季領先3:1下反勝為敗之仇；KD除咗首嘗總冠軍滋味，亦憑總決賽場均35.2分、8.4籃板、5.4助攻嘅數據，大熱當選FMVP！

背水一戰嘅騎士開段打出一段9:0優勢，勒邦占士（LeBron James）早早攻入12分，並乘勇士有杜蘭特同K湯遜（Klay Thompson）早早兩犯纏身下，首節領先37:33。騎士第二節連取4分，拋離至41:33，但勝利勢頭到此為止，皆因勇士3分手風漸順，並把握騎士失誤兼啞火，由伊古達拉（Andre Iguodala）「爆dunk」策動大反擊，7分鐘內打出一段36:11嘅攻勢反超前，最多領先17分下，半場領先71:60。雙方亦延續上場濃厚火藥味，大衛韋斯（David West）同K艾榮（Kyrie Irving）一次爭奪籃板後，前者無名火起向艾榮有所動作，結果韋斯同前來「幫拖」嘅T湯臣（Tristan Thompson）、JR史密夫（JR Smith）齊齊「食T」。

騎士下半場拒絕投降，「三巨頭」以外兩位正選JR史密夫同T湯臣今場大打爭氣波，合共19投15中取得40分，為球隊咬緊比分，但杜蘭特同史堤芬居里（Stephen Curry）繼續「hot hand」，完第三節保持5分優勢。進入第4節，騎士最近追至落後3分，但幾次進攻失誤後再度被拉開，注定返魂乏術，勇士尚餘4分13秒時拉開至122:108鎖定勝局，最終以129:120取勝，總場數贏4:1，三年內第二度封王。

今場投射命中率高達70%、獨取39分嘅杜蘭特賽後大熱當選FMVP，佢亦表現激動，同入場支持嘅母親相擁，並表示：「我哋做到了。我喺8歲時曾經同你講過（奪得總冠軍），我哋做到了。」此外，KD成為歷來第7位，亦係繼2002年嘅奧尼爾（Shaquille O'Neal）後首位於當屆NBA總決賽每場均射入30分或以上嘅球員，以及第3位擁有4屆得分王兼總冠軍榮譽嘅球員，同米高佐敦（Michael Jordan）、張伯倫（Wilt Chamberlain）齊名。

至於今場交出41分、13籃板「雙雙」嘅占士，雖然成為總決賽系列賽取得場均大三元嘅第一人，卻同時成為第4位吞下5次或以上總決賽敗仗嘅球員，佢賽後坦言：「我喺呢個系列賽每場賽事已經竭盡所能，所以我冇理由需要俯首黯然離場。」