東涌藍天海岸一個相連單位，剛以月租四萬三，每呎逾十九蚊租出，破咗去年底同區東堤灣畔複式三萬，每呎十八嘅紀錄，成為該區歷來月租呎租最高成交。
個單位係三座高層C同D室，近二千三呎，呎租比普通分層高一倍，夠租中半山同南區大部份差唔多大嘅豪宅。好似中半山地利根德閣二千呎，月租四萬二；大潭陽明山莊二千一呎，租緊四萬五；甚至山頂千零呎嘅環翠園，月租都係四萬左右。
香港置業簡鋈倫話，高價租出嘅單位，係屋苑少數可以打通嘅自製相連戶，呢類單位暫時無租盤，加上業主願意負責打通費用，兼連全屋家具。
租客係航空公司高層，鍾情相連單位同機場海景全貌，雙方一拍即合。業主去年底以逾六百六萬買入，回報近八厘。

炒家貨買得過
美聯報告，上半年登記最多嘅二手屋苑，荔枝角美孚新邨排第一位，有六百幾宗。蘭西噚日同美記美孚分行高級區域經理吳志輝傾開，佢透露，美孚活躍同多炒家有關，而唔少買家明知係炒家貨都肯接。
原來炒家入貨後，大多會翻新單位，裝修費每呎兩百蚊，包括重鋪地板、換水喉等，間屋即刻變得靚仔晒，加上樓價已經包埋裝修費，變相可以做埋按揭，唔使再攞錢做裝修。
吳志輝話，首季成交中，炒家佔三四成，第二季市況逆轉，比例跌至不足一成。
美孚現有五百六十個盤，叫價每呎二千五，成交近二千三。