【李八方online】議員考察大灣區 要用250蚊租車放行李
大灣區李八方
梁振英在任特首時都帶過官員團去大灣區考察。資料圖片
立法會一小組今朝傾過下個月去大灣區考察嘅安排。經濟發展、財經、工商,以及資訊科技及廣播4個事務委員會召開嘅聯席會議,揀咗經民聯林健鋒做考察團團長,然後就正式傾吓考察團嘅安排。
呢次為期3日2夜嘅考察團將會睇深圳、東莞、佛山、中山同廣州5個城市,行程包括同市領導會面,以及參觀華為坂田總部等,初步估計每位議員開支約6,100蚊,而呢6,100蚊就包咗旅遊巴、高鐵車票費、住宿連膳食同埋旅遊保險等,但當中一項費用,令建制派旅遊界議員姚思榮都有意見,就係價值每人250蚊嘅行李車費。姚思榮話,成個團都只係得3日2夜,有冇需要租架車嚟載行李?放番喺議員坐嘅旅遊巴咪得咯!
身兼行會成員嘅團長林健鋒即刻幫政府講說話,指預計去呢個團嘅議員都多要分兩架旅遊巴,搵專車載行李,起碼唔使等行李喎。姚思榮聽完依然有啲保留,叫林健鋒再諗諗。連建制派都覺得政府使錢使得唔合理,政府豈能懶理?而議員考察係有公帑津貼,試問點可以亂咁使錢?