余安安、馬詩慧今日喺中環出席YSL活動，近日「房東」涉吸毒案全城熱話，而余安安曾經同房祖名拍過《早熟》，佢話：「梗係擔心啦，我都好錫佢，雖然佢0依家成日喺內地，但耐唔耐都會傾兩句，拍《早熟》時，就算唔拍戲，都會約出嚟飲嘢，同佢爸爸又熟，發生咁嘅事好唔開心，好擔心。」

安安話冇聯絡佢哋，呢個時候唔好騷擾佢哋一家人，快啲搞掂件事。

講到祖名吸毒有8年，係咪好驚訝？佢話：「《早熟》應該超過8年，但我想講Jaycee（祖名）一向係好乖嘅小朋友，係我見少數，好多叫富二代，但佢好尊師重道，有禮貌嘅後生仔，咩原因都好，曳咗做錯事、貪玩，好希望俾個機會佢、0依家已經係好大教訓，希望比機會改過，為社會做番啲哩補償番。」

問佢同嬌姐（林鳳嬌）熟唔熟？安安話普通啦，講到嬌姐好傷心，佢話：「做媽媽一定好傷心，仔女出事，父母最傷心。」

問佢有冇提醒囡囡唔好受誘惑？佢話大女係律師，一定循規蹈矩，細女去美國讀書容易接觸、都有叮囑佢要小心、潔身自愛。