當年今日

隔牆有耳:起錨搵食 煲呔深入元朗 - 李八方

蘋果日報 2010/12/29 00:00


煲呔好鍾意四圍搵食,本月11號,佢朝早先去深水埗米芝蓮食肆「添好運」食點心,然後去工展會購物,下晝就孖住老婆去咗元朗洪水橋大發餐廳食晏。煲呔山長水遠由中環入到元朗,原來因為呢間茶餐廳有首屆「金茶王大賽」金獎得主坐鎮。大發餐廳奶茶王賴師傅同八方講,唔止煲呔兩公婆不時嚟嘆茶,有時佢細佬曾蔭培夫婦都會一齊嚟。齋飲奶茶始終有啲寡,據聞煲呔同時柯打三文治醫肚,而屬澳門人嘅曾太就對豬扒包情有獨鍾,幾乎次次都會食。
私人時間嘆茶,煲呔好少同店員談論政事,反而不時同賴師傅分享奶茶經,對用乜茶葉同落幾多糖同奶都幾有心得。平時煲呔嘆茶多數拒絕同人合照,適逢煲呔嘆茶翌日餐廳為屯門博愛醫院義賣籌款,煲呔先肯做生招牌呼籲市民解囊。