【李八方online】同高志森算帳!飛天朱話要「癲」畀佢睇

蘋果日報 2016/04/21 06:00

梁振英高志森文匯報李八方ONLINE空勤人員總工會朱幼麟飛天朱

啱啱過咗嘅周日,機場好熱鬧,幾大香港空勤人員總工會發動集會,最終逾2,500人到場抗議特首梁振英涉嫌濫權事件,其中最惹關注嘅當然係外號「飛天朱」、前港區人大代表朱幼麟,佢爆料話有當日有份接聽梁特電話嘅地勤人員「講電話講到喊」。

飛天朱都預咗咁樣踢爆方丈,肯定會遭殃,結果畀《文匯報》發評論文章抹黑佢反中亂港;原來導演高志森同日咁啱落機,目睹集會「盛況」,仲喺facebook留言:「撞佢個鬼,一出機場就見到班顛(癲)狗。」

飛天朱變癲狗?真係笑大人個口。身在匈牙利嘅飛天朱,見到高志森口出狂言,都忍唔住越洋發炮,叫傳媒轉達佢嘅睇法;除咗話明「他(高)已上了我的黑名單」,仲事先張揚話:「回來再同他算賬,給他看我怎樣來癲他!」

八方聽到都笑到娃哈哈,飛天朱5月初返港,唔知高志森有冇力招架?