華爾街嘅投資銀行家被指因為放肆貪婪，搞到全球金融市場一鑊熟，所謂人神共憤，恒隆地產（101）主席朗尼．陳啓宗亦係其中之一。佢噚日出席理工大學舉行嘅中國經濟發展論壇，完全流露佢對呢班i-banker嘅一貫睇法──冇乜好感。
佢話公司從來唔請投資銀行家，亦叫個仔唔好做投資銀行；仲話如果有女，都會叫佢唔好嫁畀投資銀行家；而i-banker設計嘅衍生工具產品，就好似瘋狗一樣，到處亂走。

問佢大市係咪到底，佢話識答嘅人肯定呃你；陳啓宗認為掌握到大方向已經唔錯，無謂一定要撈底或者摸頂。好似已經去世嘅華懋前主席王德輝，一世人精打細算，想話摸頂將華懋上市，點知試過3次都唔成功，因為大市3次上到頂峯就迅速滑落，結果華懋至今都未上市。
講番自己公司恒隆，朗尼陳話重點係要摸清大方向，恒隆過去十幾年買地成績都唔差，賣樓亦靠近頂點出貨。不過佢話如果吓吓摸頂出貨，唔留番啲水位畀人賺，邊個仲會幫襯你？
總結金融海嘯嘅經驗，佢亦有獨到見解，話現階段爆發金融海嘯，對中國嚟講可算係良機，祖國國運都算好，因為若喺5年前發生，中國亦冇國力喺國際上有發言權；若遲5年發生，資本賬有更大開放，所受打擊會更大。

朗尼陳仲話，大家所追求嘅價值亦要好好三思，以免再搞出金融海嘯同毒奶粉事件；對於私人投資基金同對冲基金要好好管制，「賺咗就要畀20%佣，輸咗就你啃晒！」佢又預期美元、歐元同人民幣將會係未來3大國際貨幣。講到尾，最重要係中國人自強，因為呢個時刻冇人幫到你。

李華華
mailto:[email protected]